Vodafone.is - Fréttir af Vodafone

GSM uppbyggingu á þjóðvegum og ferðamannastöðum á Vestfjörðum lauk formlega þann 17. desember, þegar hringt var úr einum stærsta GSM síma í heimi af Gemlufallsheiði, milli Önundarfjarðar og Dýrafjarðar. Haraldur Júlíusson, formaður Björgunarfélags Ísafjarðar hringi í 112 þar sem Þórhallur Ólafsson, framkvæmdastjóri Neyðarlínunnar, varð fyrir svörum. Haraldur og Þórhallur sögðu áfangann gríðarlega mikilvægan út frá öryggissjónarmiðum, enda væri GSM síminn orðinn eitt mikilvægasta öryggistæki almennings á ferðum sínum um landið.

Alls hafa um 30 nýir sendar frá Vodafone verið teknir í gagnið á Vestfjörðum á árinu. Stór svæði á sjó og landi, sem áður voru sambandslaus, eru nú komin í gott GSM samband. Hluti uppbyggingarinnar er á markaðslegum forsendum en einnig hafa fjölmargir sendar verið settir upp að tilstuðlan Fjarskiptasjóðs, sem fól Vodafone verkið í kjölfar útboðs.

Kristjáni L. Möller, samgönguráðherra, var einnig tilkynnt um lok þessa áfanga í dag. Hringt var í hann ofan af Gemlufallsheiðinni úr hinum ofvaxna GSM síma, sem upphaflega var smíðað til afnota í auglýsingar Vodafone. Í tilefni dagsins var símbúnaður settur í tækið svo hægt væri að nota það eins og hvern annan síma.   Kristján Möllers sagðist fagna því, að GSM þjónusta á Vestfjörðum væri nú orðin sambærileg því sem gerðist víðast annars staðar á landinu. Hér væri um að ræða grundvallarþjónustu fyrir íbúa og ferðafólk, sem væri til þess fallin að bæta öryggi vegfarenda og auka lífsgæðin í fjórðungnum.

Hrannar Pétursson, upplýsingafulltrúi Vodafone,  sagðist afar stoltur af þeim frábæra árangri sem hefði náðst við stækkun GSM þjónustusvæðisins á þessu ári og þeirri staðreynd, að Vodafone hefði tekið forystuna í uppbyggingu GSM þjónustu á landsbyggðinni.

Óvæntur gestur birtist reyndar á Gemlufallsheiðinni í dag, í líki jólasveins í fullum skrúða. Jólasveinninn prófaði að sjálfsögðu símtækið, en sagðist annars vera á leiðinni til Þingeyrar að heimsækja leikskólabörn.