Forrit í símann þinn
Hvar fæ ég forrit?
Það veltur á stýrikerfi símans þíns á hvaða forritamarkaði þú getur keypt forrit.
Ef síminn þinn er Android-sími færðu forrit í hann á Android Market. Fjöldi góðra ókeypis forrita er í boði, en ef þú skráir þig og kortanúmer á Google Checkout getur þú einnig keypt forrit í símann.
Ef þú átt snjallsíma frá Nokia færðu forrit í símann þinn á Ovi Store, en Nokia snjallsímar nota Symbian stýrikerfið. Í Ovi Store má m.a. sækja Ovi Maps, en það er fáanlegt fyrir flesta nýrri Nokia snjallsíma. Nánari upplýsingar eru á OviMaps.is.
Ef þú ert með iPhone, iPad eða iPod Touch færðu forrit í App Store hjá Apple en þar fást hundruð þúsunda forrita af öllu tagi. Þessi tæki frá Apple nota stýrikerfið iOS.
BlackBerry tæki geta sótt forrit af App World.
Hraðkóðar
Hraðkóði sem skutlar þér beint inn á leikjabúðina okkar, en þar er að finna úrval leikja, m.a. fyrir Android símtæki.
Hraðkóði (QR code) er tvívítt strikamerki sem notað er til að pakka saman upplýsingum sem síðan eru lesanlegar með strikamerkjalesurum, t.d. í símum. Algengasta notkun hraðkóða er að koma á framfæri slóðum að forritum eða vefsíðum svo ekki þurfi að slá þær inn í síma. Í stað innsláttar er myndavél símans notuð til að lesa kóðann og sérstakt forrit vinnur úr honum og birtir það sem kóðað var.
Hraðkóða er hægt að búa til t.d. á vefsíðum eins og BeQRious og Kawaya.
Hvernig les ég hraðkóða?
Forritið ScanLife er til fyrir öll símastýrikerfi og það má nota til að lesa úr hraðkóðum. Auðvitað eru til fleiri forrit sem gera það sama og hver og einn getur notað það sem hann vill.
Hvernig er hraðkóðinn lesinn?
Ræstu lestrarforritið (ScanLife eða það forrit sem þú notar) og þegar myndavélin er komin í gang skaltu beina henni að hraðkóðanum. Forritið gefur til kynna þegar það hefur skynjað kóðann og lesið úr honum og þá birtist það sem kóðinn inniheldur, hvort sem það er vefslóð, nafnspjald eða eitthvað annað.
Hér erum við líka:
Fréttabréf
Viltu fá gagnlegt fréttabréf annað slagið?