Sendu SMS í 1414
Í dag tókum við í notkun nýja leið til að hafa samband við þjónustuver Vodafone. Nú er hægt að senda fyrirspurn eða þjónustubeiðni með SMS í 1414 og við svörum um hæl.
SMS í 1414 er einföld og þægileg leið til að fá svör við spurningum eða aðstoð frá þjónustuverinu. Þú einfaldlega skrifar SMS með spurningu eða beiðni um aðstoð – best er að nefna hvort það snerti farsíma, heimasíma, internet, sjónvarp, fyrirtækjaþjónustu eða reikninga – sendir á númerið 1414 og þjónustuver Vodafone bregst við. Einföldum spurningum getum við oft svarað með SMS, en við flóknari úrlausnir hringjum við til baka.
Við munum alltaf svara innan 24 tíma, en meðalsvartíminn verður mun styttri en það. Í neyðartilvikum er með öðrum orðum betra að hringja í 1414 en senda SMS, en í öllum öðrum tilvikum er einfaldast og þægilegast að senda SMS í 1414 og losna við bið eftir aðstoð í símaverinu. Að sjálfsögðu er alveg gjaldfrjálst að senda SMS í 1414.
Þessi þjónusta er glæný hjá okkur og því ekki alveg búið að sníða alla vankanta af – við getum til dæmis ekki tekið á móti íslenskum stöfum enn sem komið er, en það ætti að komast í lag innan nokkurra daga. Thannig ad naestu daga vaeri fint ef skilabod inniheldu ekki islenska stafi. 
Prófið SMS í 1414 næst þegar þið þurfið að fá aðstoð hjá Vodafone – og finnið muninn!
Athugasemdir